مقالاتِ سرسیّد (حصہ دو از دہم)

مقالاتِ سرسیّد کے حصہ دو از دہم میں تقریری مضامین کا انتخاب کیا گیا ہے۔ ان میں سے زیادہ تر مضامین وہ ہیں جو سرسیّد کے جاری کردہ رسالے ’’تہذیب الاخلاق‘‘ یا اخبار ’’سائنٹفک سوسائٹی‘‘ علی گڑھ میں شائع ہوئے۔ البتہ کچھ مضامین ایسے بھی ہیں جو الگ سے پمفلٹ وغیرہ کی شکل میں شائع کیے گئے۔ ان مقالات میں بھی نہ صرف یہ کہ سرسیّد کے طرزِ تحریر سے واقفیت ملتی ہے بلکہ ان کے علمی استدلال اور وسعتِ مطالعہ کا بھی پتہ چلتا ہے۔ ان مقالات کو پڑھنے کے بعد قاری کے ذہن میں سرسیّد کی علمی شخصیت خوب نکھر کر سامنے آ جاتی ہے اور اس کے ساتھ ساتھ سرسیّد کے مذہبی نظریات سے بھی واقفیت ملتی ہے۔ سرسیّد کے متعدد مبسوط مقالات اور مضامین ایسے بھی ہیں جو اُنھوں نے مختلف اوقات میں مختلف مقامات پر اور مختلف موضوعات پر لکھ کر یا زبانی پڑھے اور وہ اُس وقت اخبارات میں چھپ کر بعد میں لوگوں کی نظروں سے اوجھل ہو گئے اور پھر دُنیا ان سے مستفید نہ ہوسکی۔ سرسیّد کے تقریری مقالات میں بھی تحریری مضامین کی طرح وہی زور، جوش اور اثر پایا جاتا ہے اور تحریر کی طرح یہ بھی مفید اور کارآمد اور نصیحت آمیز ہیں۔ سرسیّد کے تقریری مقالات، لیکچر اور خطبات مولوی امام الدین گجراتی نے 1900ء میں مہیا کیے تھے جو کہ منشی فضل الدین تاجرِ کتب لاہور نے شائع کیا تھا۔ موجودہ انتخاب بھی اسی جلد سے کیا گیا ہے اور اس ضخیم مجموعہ میں سے صرف وہی مقالات منتخب کیے گئے ہیں جن میں سرسیّد نے مستقل عنوانات اور مفید موضوعات پر اپنے خیالات کا اظہار کیا ہے، باقی خطبات اور مقالات جو وقتی نوعیت کے تھے اور چنداں مفید بھی نہیں تھے، اُنھیں چھوڑ دیا گیا ہے۔ اس جلد میں روسا، بھلائی، ترقی، طریقۂ علاج، قومی تعلیم ، اتفاق و اتحاد، ترقی و تعلیم جیسے موضوعات پر سرسیّد کی تقاریر کو شامل کیا گیا ہے۔