مقالاتِ سرسیّد (حصہ شانزدہم)

مقالاتِ سرسیّد کے حصہ شانزدہم میں نایاب رسائل و مضامین کا انتخاب کیا گیا ہے۔ مقالاتِ سرسیّد کے اس سولہویں حصے میں سرسیّد کے ایسے رسائل و مقالات پیش کیے گئے ہیں جو عام طور پر نایاب و ناپید ہیں بلکہ بعض مضامین کا تو علمی ذوق رکھنے والے بزرگوں اور سرسیّد کی تصانیف سے واقف اصحاب کو بھی پتہ نہیں۔ ان نایاب و نادر رسائل و مقالات کو اکٹھا کرنے میں مرتب کو بدمعاملگی، بخل، بدکلامی کا سامنا کرنے کے علاوہ زرِ کثیر خرچ کرنا پڑا۔ ان مضامین میں نہ صرف یہ کہ سرسیّد کے طرزِ تحریر سے واقفیت ملتی ہے بلکہ ان کے علمی استدلال اور وسعتِ مطالعہ کا بھی پتہ چلتا ہے۔ اکثر مضامین سے پتہ چلتا ہے کہ چند صفحوں کے ایک مضمون کے لیے سرسیّد نے نہ جانے کتنی ہی کتابوں کو کھنگالا ہوگا۔ ان مضامین کو پڑھنے کے بعد قاری کے ذہن میں سرسیّد کی علمی شخصیت خوب نکھر کر سامنے آ جاتی ہے اور اس کے ساتھ ساتھ سرسیّد کے مذہبی نظریات سے بھی واقفیت ملتی ہے۔ ان مضامین کو پڑھنے سے پتہ چلتا ہے کہ سرسیّد روایتی طرز کے مولوی نہیں تھے بلکہ ہر بات کو دلیل اور عقل سے پرکھ کر قبول کرتے تھے۔ بعض مضامین میں سرسیّد نے یورپین مصنّفین اور عیسائی پادریوں کے اعتراضات کو ردّ کیا ہے تو کہیں پر عام مسلمانوں کے مولویانہ نظریات کو بھی آڑے ہاتھوں لیا ہے۔ اس جلد میں جن نایاب رسائل کو مضامین کو شامل کیا گیا ہے وہ یہ ہیں: جامِ جم، تسہیل فی جرِّ الثقیل، فوائد الافکار فی اعمال الفرجار، شاہجہاں آباد کے لوگوں کا بیان، قولِ متین در ابطالِ حرکتِ زمین، دیباچہ تاریخ فیروز شاہی ضیاء الدین برنی، قدیم نظامِ دیہی ہندوستان، یادداشت نسبت ترقی حیثیت اراضی و امداد، سیرتِ فریدیہ، ضمیمہ اور تحفۂ حسن۔