مقالاتِ علامہ عبدالعزیز میمن

مقالاتِ عبدالعزیز میمن، جو کہ پہلی بار کتابی صورت میں مجلس ترقی ادب لاہور سے شائع ہوئی ہے، اس کے مرتب و مدون معروف محقق محمد راشد شیخ ہیں۔ علامہ عبدالعزیز میمن کا نام عربی زبان و ادب میں ید طولیٰ رکھنے والے ثقہ عالم اور استاد کے طور پر عالمی شہرت کا حامل ہے۔ دلچسپ بات یہ ہے کہ اہلِ زبان بھی انھیں لغۃ العربیہ کا امام مانتے ہیں اور یورپی مستشرقین ان کی علمی و تحقیقی بصیرت اور معیار کے معترف اور خوشہ چیں ہیں۔ علامہ صاحب کا سارا کام تحقیقی نوعیت کا ہے۔ اس پایے کے عالم ہونے کے باوجود تمام عمر ستائش اور صلے سے بے نیاز رہے۔ محمد راشد شیخ نے عرضِ مرتب کے عنوان سے تحریر کیے گئے مقدمے میں علامہ عبدالعزیز میمن کے احوال اور آثار کا جائزہ پیش کیا ہے۔ چناںچہ اس کتاب کے مطالعے سے قاری علامہ میمن کی علمی بصیرت سے متعارف ہونے کے ساتھ ساتھ ان کی شخصیت سے بھی کماحقہٗ آگاہ ہو جاتا ہے۔ کتاب میں حلاج، ابنِ رشیق، ابوالعلاء المعری، ابو تمام، علامہ ابنِ جوزی کے کام پر مبنی پُرمغز مقالات کے علاوہ دیگر موضوعات، آداب العربیہ، گجرات کا عربی سفرنامہ، اسلام کی بدنصیبی، افاداتِ میمنی (عربی لغت پر خطبات) پر مضامین شامل ہیں نیز عربی کتب پر علامہ صاحب کے تحریر کردہ مختلف کتب کے لیے لکھے گئے پیش لفظ بھی شامل کتاب ہیں جن سے ان کی تنقیدی بصیرت کا بھی پتا چلتا ہے۔